Cael help i wneud eich taliadau llog morgais

Efallai y gall perchnogion tai sy’n cael budd-daliadau penodol gael help tuag at daliadau llog morgais a elwir yn Gymorth ar gyfer Llog Morgais (SMI). Cewch wybod os ydych yn gymwys, sut i hawlio SMI a pha gymorth ychwanegol sydd ar gael yn ystod y dirywiad economaidd.

SMI - beth ydyw a phwy sy'n gymwys

Efallai y byddwch yn cael help gyda thaliadau llog morgais fel rhan o'ch budd-daliadau os ydych yn berchennog ty ac yn gymwys ar gyfer:

• Cymhorthdal Incwm
• Lwfans Ceisio Gwaith sy’n seiliedig ar incwm
• Lwfans Cyflogaeth a Chymorth sy'n gysylltiedig ag incwm
• Credyd Pensiwn

Ar gyfer morgais neu fenthyciad i brynu neu wella eich cartref yn unig y cewch help tuag at daliadau llog morgais. Caiff ei dalu’n uniongyrchol i'ch benthyciwr fel arfer. Nid oes sicrwydd y cewch SMI am fenthyciad y byddwch yn ei drefnu.

Cewch wybod am fudd-daliadau y gallech fod yn gymwys i’w cael drwy ddilyn y cysylltiadau isod.

Cymhorthdal Incwm
Lwfans Ceisio Gwaith
Lwfans Cyflogaeth a Chymorth
Credyd Pensiwn (Directgov)

Beth na chaiff ei gynnwys yn yr SMI

Nid yw’r SMI ar gael i helpu i dalu:

• y swm rydych yn ei fenthyg (dim ond y llog ar y morgais sy’n cael ei dalu)
• unrhyw beth tuag at bolisïau yswiriant sydd gennych
• ôl-ddyledion morgais

Gwneud cais am SMI a chael atebion i’ch cwestiynau

Cysylltwch â’r Ganolfan Byd Gwaith neu'r Gwasanaeth Pensiwn i:

• wirio eich cymhwyster
• hawlio help i wneud eich taliadau llog morgais
• Gofyn am y daflen IS8 (Home owners- help with housing costs)

Cysylltwch â’r Canolfan Byd Gwaith
Cysylltwch â'r Gwasanaeth Pensiwn

Newidiadau i SMI yn ystod y dirywiad economaidd

Mae help ychwanegol dros dro wedi bod ar gael drwy SMI ers 5 Ionawr 2009 oherwydd y dirywiad economaidd.

Amodau sy'n berthnasol i SMI ers 5 Ionawr, 2009

Mae yna rai amodau sy'n berthnasol i'r rhan fwyaf o’r hawliadau am help gyda’ch llog morgais a wnaed ers 5 Ionawr 2009:

• rydych yn aros 13 wythnos o'r dyddiad y byddwch yn hawlio cyn i chi gael SMI (gelwir hyn yn gyfnod aros ac roedd yn arfer bod am 39 neu 26 wythnos)
• gallwch hawlio llog morgais am hyd at £200,000 o’ch morgais (roedd hyn yn arfer bod yn £100,000)
• os ydych wedi hawlio Lwfans Ceisio Gwaith ar neu ar ôl 5 Ionawr 2009, cewch SMI am ddwy flynedd yn unig
• os oeddech yn dal i fod yn y cyfnod aros i gael SMI o dan yr hen amodau ar 4 Ionawr 2009, byddwch yn gymwys i gael yr help ychwanegol dros dro

Nodwch, y Gyfradd Llog Safonol a ddefnyddir i gyfrif SMI, wedi cael ei rewi ar 6.08% ar gyfer holl gwsmeriaid SMI hyd mis Mehefin 2010.

O 5 Ionawr 2010 estynnwyd help i grŵp penodol o gwsmeriaid:

• sy’n gwneud cais am un o'r budd-daliadau a grybwyllir uchod ar neu ar ôl 5 Ionawr 2009
• Nad oedd â’r hawl i'r budd-dal hyd nes daeth eu costau tai yn daladwy

Ni ellir ôl-ddyddio’r taliadau hyn, ond mae'r Llywodraeth wedi cytuno i wneud taliadau statudol ychwanegol i fynd i'r afael â diffygion posib a gododd rhwng 5 Ionawr, 2009 a 4 Ionawr 2010.

Bydd manylion y cynllun taliad statudol ychwanegol yn cael eu cyhoeddi cyn bo hir. Mae’r Ganolfan Byd Gwaith wedi cadw manylion o'r rhai yr effeithir arnynt, a bydd yn cael ei gysylltu â chwsmeriaid uniongyrchol maes o law.

Os oes gennych gwestiynau am yr amodau hyn, cysylltwch â’r Ganolfan Byd Gwaith neu’r Gwasanaeth Pensiwn drwy ddilyn y cysylltiadau canlynol.

Cysylltwch â’r Ganolfan Byd Gwaith
Cysylltwch â'r Gwasanaeth Pensiwn

Os ydych yn hawlio Credyd Pensiwn - amodau sy'n berthnasol i SMI

Os ydych yn hawlio Credyd Pensiwn, mae amodau penodol sy'n berthnasol i hawlio help tuag at daliadau llog morgaos, sef:

• nid oes cyfnod aros cyn i chi gael help gyda thaliadau llog morgais
• gallwch hawlio ar gyfer llog morgais ar hyd at £100,000 o’ch morgais

Symud i Gredyd Pensiwn o fudd-daliadau eraill

Gallwch gael help gyda’ch llog morgais ar hyd at £200,000 o’ch morgais os byddwch yn symud ymlaen i Gredyd Pensiwn o fewn 12 wythnos o derfynu cais am:

• Cymhorthdal Incwm
• Lwfans Ceisio Gwaith yn seiliedig incwm
• Lwfans Cyflogaeth a Chymorth sy'n gysylltiedig ag incwm

Gallwch barhau i gael yr un faint o help os byddwch yn dal yn gymwys i gael Credyd Pensiwn.

SMI - beth oedd ar gael cyn y dirywiad economaidd

Roedd gwahanol amodau yn gymwys i SMI hyd at 5 Ionawr 2009 - cyn i amodau newydd gael eu cyflwyno o ganlyniad i’r dirywiad economaidd. Os cawsoch help i wneud taliadau llog morgais cyn y dyddiad hwn, byddwch yn parhau i gael yr un lefel o help.

Amodau sy'n berthnasol i SMI cyn 5 Ionawr, 2009

Mae’r amodau canlynol yn berthnasol i hawliadau SMI cyn 5 Ionawr 2009:

• gallwch ond hawlio llog morgais am hyd at £100,000 o’ch morgais
• os gwnaethoch gymryd morgais neu fenthyciad gwella'r cartref ar ôl 2 Hydref 1995, mae cyfnod aros o 39 wythnos - os byddwch yn gymwys, byddwch yn cael SMI o wythnos 40

SMI - os ydych yn 'agored i niwed' neu wedi cymryd benthyciad cyn 2 Hydref 1995

Mae amodau penodol sy'n gymwys i chi gael help gyda'ch llog morgais os gwnaethoch gais cyn 5 Ionawr 2009 ac:

• rydych yn cael eich ystyried fel rhywun sy’n agored i niwed, e.e. rhiant unigol sy’n hawlio budd-dal oherwydd bod eich partner wedi eich gadael
• gwnaethoch gymryd benthyciad cyn 2 Hydref 1995

Os cewch eich ystyried fel rhywun sy’n agored i niwed, neu os gwnaethoch gymryd benthyciad cyn 2 Hydref 1995:

• ni chewch unrhyw help gyda thaliadau llog morgais ar gyfer wyth wythnos gyntaf eich cais
• cewch 50 y cant o'r llog morgais ar gyfer y 18 wythnos nesaf
• cewch 100 y cant o'r llog morgais o'r 27ain wythnos

Os ydych am wybod os cewch eich ystyried fel rhywun sy’n agored i niwed, cysylltwch â'r Ganolfan Byd Gwaith drwy ddilyn y cyswllt isod.

Cysylltwch â’r Ganolfan Byd Gwaith