Budd-dal Anabledd Anafiadau Diwydiannol

Beth yw Budd-dal Anabledd Anafiadau Diwydiannol?

Arian ychwanegol yw hwn os ydych yn sâl neu'n anabl oherwydd damwain neu afiechyd a achoswyd gan waith.

A allaf gael Budd-dal Anabledd Anafiadau Diwydiannol?

Damweiniau

Rydym yn defnyddio damwain i olygu digwyddiad neu gyfres o ddigwyddiadau yn y gwaith nad oeddent yn fwriadol ac a arweiniodd at anaf personol. Gallwch wneud cais ar unrhyw adeg i gael penderfyniad gennym p'un a oedd eich damwain yn ddamwain ddiwydiannol. Nid yw hwn yn gais am fudd-dal. Ond gallai fod o gymorth os byddwch yn penderfynu gwneud cais am fudd-dal yn y dyfodol oherwydd eich damwain.

Afiechydon

Mae'n rhaid:

• eich bod wedi cael y clefyd o ganlyniad i waith,
• eich bod wedi'ch cyflogi ym Mhrydain Fawr,
• eich bod wedi gwneud mathau penodol o waith, a
• bod y gwaith wedi'i wneud ar 5 Gorffennaf 1948 neu ar ôl hynny.

Efallai y bydd angen i chi gael archwiliad meddygol i'n helpu i benderfynu graddau'ch anabledd a pha mor hir y bydd yn para.

Ni fyddwn yn talu Budd-dal Anabledd Anafiadau Diwydiannol i chi os gwnaethoch y gwaith a'ch gwnaeth yn sâl:

• pan oeddech yn hunan-gyflogedig, neu
• cyn 5 Gorffennaf 1948.

Faint y gallaf ei gael?

Mae faint y gallwch ei gael yn seiliedig ar ba mor anabl rydych chi.

Gellir ei dalu ar ôl 15 wythnos (90 diwrnod heb gyfrif dydd Sul) o'r diwrnod cyntaf y cewch eich gwneud yn anabl gan yr afiechyd neu'r ddamwain.

Pryd a sut y dylwn wneud cais?

Os credwch y gallech gael Budd-dal Anabledd Anafiadau Diwydiannol, gwnewch gais cyn gynted â phosibl.

Os byddwch yn oedi, gallech golli rhywfaint o fudd-dal.

Gwnewch gais ar unwaith os oes gennych salwch a achoswyd gan eich gwaith.

Rydym yn delio â Budd-dal Anabledd Anafiadau Diwydiannol yn y ganolfan trafod budd-daliadau. Cysylltwch â’r ganolfan dros y ffôn neu lythyr.

Cymru
Budd-dal Anafiadau Diwydiannol Castleford
Leodis Way
Leeds LS88 8AQ
Ffôn: 0845 758 5433
Ffôn Testun: 01977 464144

 Budd-dal Anabledd Anafiadau Diwydiannol (280.45kb)

 Budd-dal Anabledd Anafiadau Diwydiannol ffurlen cais (238 kb)

 Ffurflen gais Budd-dal Anabledd Anafiadau Diwydiannol (afiechyd penodol) (293.60kb)

Cymorth gyda PDFs