Deall Deddfwriaeth Oedran - Beth mae'n ei olygu?

Ar 1 Hydref 2006 daeth Rheoliadau Cydraddoldeb Cyflogaeth (Oedran) â llu o ganllawiau a rheolau newydd i rym, wedi'u hanelu at atal unrhyw fath o weithredoedd neu ymddygiad niweidiol yn gysylltiedig ag oedran yn y gweithle.

Er nad yw'r rheoliadau yn effeithio ar yr oedran y gall pobl wneud cais am eu pensiwn y wladwriaeth, maent yn:

• Gwahardd oedran ymddeol anghyfiawn o dan 65 oed.
• Gwahardd gwahaniaethu ar sail oedran o ran recriwtio, dyrchafu a hyfforddiant.
• Cael gwared ar y terfyn oedran presennol ar gyfer diswyddo annheg a hawliau dileu swyddi.

Hefyd, cyflwynodd y rheoliadau:

• Hawl i gyflogeion wneud cais i weithio y tu hwnt i'w hoedran ymddeol a dyletswydd ar gyflogwyr i ystyried y cais hwnnw.
• Gofyniad newydd i gyflogwyr i roi rhybudd o chwe mis o leiaf i gyflogeion ynglyn â'u dyddiad ymddeol bwriadedig fel y gall unigolion gynllunio'n well ar gyfer eu hymddeoliad, a bod yn hyderus na ddefnyddir yr 'ymddeoliad' fel esgus dros ddiswyddo annheg.
• Mae'r rheoliadau yn berthnasol i gyflogaeth a hyfforddiant galwedigaethol. Maent yn gwahardd gwahaniaethu uniongyrchol ac anuniongyrchol ar sail oedran na ellir ei gyfiawnhau, a phob math o aflonyddu ac erledigaeth ar sail oedran (ifanc neu hen).

Ymhlith y newidiadau eraill roedd:

• Dileu'r terfyn oedran uchaf ar gyfer diswyddo annheg a hawliau dileu swydd, gan roi'r un hawliau i weithwyr hyn i hawlio diswyddo annheg.
• Dileu'r terfynau oedran ar gyfer Tâl Salwch Statudol, Tâl Mamolaeth Statudol, Tâl Mabwysiadu Statudol a Thâl Tadolaeth Statudol. Felly, mae'r pedwar taliad statudol yn gymwys yn union yr un ffordd i bawb.
• Rhoi eithriadau ar gyfer llawer o reolau sy'n seiliedig ar oedran mewn cynlluniau pensiwn galwedigaethol.

I gael rhagor o wybodaeth a chyngor ar ddychwelyd i'r gwaith, ewch i www.canolfanbydgwaith.gov.uk