cadw mewn cysylltiad

y cylchlythyr misol i randdeiliaid y Ganolfan Byd Gwaith

Rhifyn 6 - Mawrth 2008

Croeso i rifyn mis Mawrth o cadw mewn cysylltiad

Bob mis, mae cadw mewn cysylltiad yn rhoi'r newyddion diweddaraf i chi gan y Ganolfan Byd Gwaith.

Mae'r rhifyn hwn yn cynnwys canlyniadau ein harolwg Boddhad Cwsmeriaid diweddar, a newyddion ar sut rydym yn gweithio mewn partneriaeth â chyflogwyr i ryddhau potensial ein cwsmeriaid blaenoriaeth nad yw'n cael ei ddefnyddio.  Mae rhywfaint o wybodaeth bwysig a wella'r cymorth sydd ar gael ar gyfer rhieni unigol, a newidiadau sydd wedi'u cynllunio i fod yn gymwys i gael budd-dal.

Hefyd, peidiwch â cholli'r cyfle i ymuno â'r Ganolfan Byd Gwaith yn ein rhaglen Community 5000 newydd.

Os oes gennych awgrym ar gyfer rhifyn yn y dyfodol, neu unrhyw adborth, rhowch wybod i ni.

Y newyddion diweddaraf

Arolwg Boddhad Cwsmeriaid y Ganolfan Byd Gwaith 2007

Yr haf diwethaf cyfwelwyd â thros 4000 o gwsmeriaid y Ganolfan Byd Gwaith  fel rhan o Arolwg Boddhad Cwsmeriaid 2007.  Roedd y canlyniadau'n galonogol:

• mae 80% o gwsmeriaid yn fodlon ar safonau'r gwasanaeth cwsmeriaid a ddarperir gan y Ganolfan Byd Gwaith
• Mae un o bob pump cwsmer o'r farn bod y safonau wedi gwella yn ystod y flwyddyn ddiwethaf
• Mae rhieni unigol a chwsmeriaid o grwpiau ethnig nad ydynt yn wyn yn fwy tebygol na'r cyffredin i weld gwelliant yn ansawdd y gwasanaeth
• Mae bron 90 y cant o gwsmeriaid sydd wedi cael cyfweliadau wyneb yn wyneb gyda staff yn fodlon ar y gwasanaeth a gafwyd
• Roedd 92 y cant o'r cwsmeriaid o'r farn eu bod wedi cael eu trin mewn ffordd gwrtais a chyfeillgar yn eu cyswllt diwethaf gyda staff y Ganolfan Byd Gwaith

Mae'r adroddiad llawn, a gyhoeddwyd ar 4 Mawrth, ar gael ar-lein ar wefan  DWP.

Mae canlyniadau'r adroddiad yn adlewyrchu'r cynnydd a wnaed o ran gwella gwasanaeth cwsmeriaid y Ganolfan Byd Gwaith. Mae gwybodaeth reoli'n dangos bod dros 90 y cant o alwadau ffôn cwsmeriaid bellach yn cael eu hateb y tro cyntaf. Mae'r Ganolfan Byd Gwaith yn treialu ffyrdd newydd o helpu ei chwsmeriaid mwy diamddiffyn i gael gafael ar ei gwasanaethau'n gyflym ac yn hawdd. 

Gwneir gwaith ymchwil pellach i wella barn ein cwsmeriaid er mwyn gwella profiad cwsmeriaid y Ganolfan Byd Gwaith – mae'r gwaith hwn yn cynnwys trafodaethau grŵp ffocws manwl ac archwilio boddhad cwsmeriaid gyda'r broses Cyswllt Cyntaf. Disgwylir canlyniadau'r astudiaethau hyn yn ystod 2008.

Partneriaethau Cyflogaeth Lleol yn dechrau cyflawni

Mae tua 3000 o'r bobl sydd fwyaf dan anfantais yn y farchnad lafur eisoes wedi dod o hyd i waith gyda mwy na 90 o gyflogwyr drwy Bartneriaethau Cyflogaeth Lleol. Mae dros 500 o gyflogwyr wedi ymrwymo i Bartneriaethau Cyflogaeth Lleol hyd yma ac mae dros eu hanner eisoes yn gweithredu ar eu cytundebau, gan helpu i wireddu potensial nad yw'n cael ei ddefnyddio pobl na chawsant eu hystyried yn y farchnad swyddi yn y gorffennol. Y newyddion diweddaraf ar Bartneriaeth Cyflogaeth Lleol.

Yn ddiweddar lansiodd y Gweinidog Gwladol dros Gyflogaeth a Diwygio Lles, Stephen Timms, y Gwobrau Partneriaeth Cyflogaeth Lleol Cenedlaethol blynyddol cyntaf a fydd yn dathlu llwyddiant ac arloesedd cyflogwyr, cyflogeion a phartneriaid sy'n ymwneud â Phartneriaethau Cyflogaeth Lleol. Caiff yr enillwyr eu cyhoeddi yn yr Oval yn Llundain ar 1 Gorffennaf. Rhagor o wybodaeth am gategorïau'r wobr a'r meini prawf.

Newyddion rhanddeiliaid

Crynodeb o wybodaeth busnes i randdeiliaid

Cytundebau Ardal Lleol Newydd

Mae'r Ganolfan Byd Gwaith wedi croesawu'r Cytundebau Ardal Lleol tair blynedd o hyd newydd yn Lloegr a fydd yn disodli'r fframweithiau perfformiad cenedlaethol lluosog y bu awdurdodau lleol ac eraill yn gweithio gyda hwy er mwyn gosod y blaenoriaethau ar gyfer eu hardaloedd.

Mae Cytundebau Ardal Lleol yn golygu proses gwneud penderfyniadau am flaenoriaethau lleol wedi'i datganoli fwy, yn ogystal â rhai elfennau o gyllid llywodraeth ganolog a datblygu dull mwy 'cydgysylltiedig', hyblyg ac effeithlon i ddarparu gwasanaethau cyhoeddus lleol.

Wrth i ddyddiad gweithredu'r Cytundebau Ardal Lleol, sef 1 Mehefin agosáu, mae Swyddfeydd y Llywodraeth ledled Lloegr wedi bod yn gweithio gydag awdurdodau lleol a'u partneriaid i gytuno ar y Cytundebau.

Un o'r newidiadau amlycaf yw cyflwyno ‘Dyletswydd i Gydweithio’ statudol newydd, sy'n ei gwneud yn ofynnol i Awdurdodau Lleol ac ‘awdurdodau partner’ a enwir (megis y Ganolfan Byd Gwaith a'r GIG) gydweithio â'i gilydd i ddatblygu targedau Gwelliannau Lleol ar gyfer y cytundebau newydd.

Yn ogystal, mae ‘Dyletswydd i Gydweithio’ yn ategu'r ymrwymiad y mae awdurdodau partner yn ei wneud i gefnogi'r gwaith o gyflawni pob un o'r targedau Gwella Lleol y maent wedi cytuno iddynt, gan gynnwys y rhai nad ydynt yn ymwneud yn uniongyrchol a'u busnes.

Mae'r Ganolfan Byd Gwaith yn benderfynol o gyflawni'r dyletswyddau newydd hyn a bod yn bartner gweithredol o fewn y Cytundebau Ardal Lleol.  Gallwch gael rhagor o wybodaeth am Gytundebau Ardal Lleol ar-lein.

Cynhadledd Cyflogwyr yn rhyddhau potensial

Mynychodd cyflogwyr a phartneriaid allweddol o bob cwr o'r wlad Gynhadledd y Llywodraeth ar 28 Ionawr, a lansiodd Yn Barod am Waith, Sgiliau ar gyfer Gweithio: Datgloi Dawn Prydain.  Mae'r cyhoeddiad yn gosod cynnig y Llywodraeth i gyflogwyr gydweithio er mwyn helpu pobl i ddod oddi ar fudd-daliadau a rhoi'r sgiliau sydd eu hangen iddynt er mwyn gwneud y gorau o'u potensial. Mae'n addo:

• darparu system llenwi swyddi effeithiol
• rhoi cymorth arbenigol er mwyn i gyflogwyr fuddsoddi yn sgiliau eu gweithluoedd;
• ei gwneud yn haws i gyflogwyr gael eu hyfforddiant mewnol eu hunain wedi'i achredu.

Yn gyfnewid am hynny, gofynnir i gyflogwyr:

• ymrwymo i fuddsoddi yn sgiliau eu gweithluoedd;
• agor eu cyfleoedd swyddi i gronfa ehangach o dalent posibl;
• rhoi treialon gwaith i'r rhai a fyddai'n elwa fwyaf ohonynt.

Mae Partneriaethau Cyflogaeth Lleol y Ganolfan Byd Gwaith yn ffordd allweddol o gyflawni hyn. Rhagor o wybodaeth am y gynhadledd a'i nodau neu dysgu rhagor am Bartneriaethau Cyflogaeth Lleol

Ymgyrch Gwerth Dysgu

Mae mis Mawrth yn fis allweddol i ddarparwyr Addysg Bellach (AB) gan fod ymholiadau ar gyfer cyrsiau sy'n dechrau ym mis Medi ddechrau cael eu cyflwyno. Felly, bydd y Cyngor Dysgu a Sgiliau yn lansio cam arall o'i ymgyrch Gwerth Dysgu llwyddiannus i gydfynd â'r ymchwydd hwn mewn diddordeb.

Bydd yr ymgyrch yn Lloegr yn unig yn cynnwys hysbysebion ar radio rhanbarthol ac yn y wasg genedlaethol hyd 16 Mawrth, a bydd pecyn cymorth yr ymgyrch ar gael i ddarparwyr AB hefyd i gefnogi eu gweithrediadau marchnata. Mae hwn ar gael o wefan Adnoddau'r Ymgyrch, ac mae'n cynnwys delweddau, copi o'r hysbyseb yn y wasg, cwestiynau cyffredin, prif ffeithiau, templed o ddatganiad i'r wasg a mwy.

I gael rhagor o wybodaeth ewch i wefan yr ymgyrch, ffoniwch linell gymorth Sgiliau Cyfranddeiliaid ar 0207 413 3400 neu anfonwch neges e-bost skillscampaign@lsc.gov.uk.

Community 5000 - ein helpu ni i'ch helpu chi

Mae DWP am wybod mwy am ei chwsmeriaid ac mae'n ymrwymedig i ddysgu sut y gallwn eu gwasanaethu'n well. Rydym hefyd am wneud gwahaniaeth gwirioneddol ar ran elusennau a grwpiau gwirfoddol.

Ar ôl llwyddiant mawr rhaglen debyg o fewn y Gwasanaeth Anabledd a Gofalwyr y llynedd, mae DWP wedi datblygu Community 5000 i roi rhagor o brofiadau gwirfoddoli i staff. Er mwyn cefnogi'r fenter hon, mae'r Ganolfan Byd Gwaith wedi addo rhoi tua 3000 o ddiwrnodau erbyn mis Gorffennaf 2008 i sefydliadau cymunedol lleol sydd â chysylltiadau agos â'n cwsmeriaid. Ein bwriad yw parhau gyda'r fenter mewn blynyddoedd i ddod hefyd.

Rydym yn bwriadu creu cysylltiadau â phartneriaid cymunedol y gallwn helpu i'w cefnogi drwy'r cynllun hwn. Os ydych o'r farn y gallai eich sefydliad elwa, hoffem glywed gennych.

Gallwn gynnig:

• amser gwirfoddolwr
• rhannu sgiliau
• safbwynt ffres a syniadau newydd.

Yn gyfnewid am hyn, byddwn yn cael:

• cipolwg gwirioneddol i fywyd ein cwsmeriaid a'r cymunedau rydym yn eu gwasanaethu
• cyfle ar gyfer datblygiad personol perthnasol
• cyfle i ymgymryd â her gadarnhaol a fydd yn rhoi hwb i forâl.

Hefyd rydym yn gobeithio y bydd rhoi cipolwg i staff ar wirfoddoli yn gweithredu fel catalydd ar gyfer parhau â'u cyfranogiad yn eu cymunedau.  I gael rhagor o wybodaeth neu i gofrestru'ch diddordeb, anfonwch neges e-bost at Sue Bell.

Newyddion cwsmeriaid

Crynodeb o wybodaeth sydd o ddiddordeb i'r rhai sy'n rhoi cyngor i gwsmeriaid

Newidiadau ar gyfer rhieni unigol

Mae tua hanner y 2.8 miliwn o blant sy'n byw mewn tlodi yn y DU yn dod o deuluoedd diwaith, gyda'r rhan fwyaf ohonynt yn deuluoedd rhiant unigol. Drwy gael rhieni i mewn i waith, a'u helpu i aros mewn gwaith, gallwn wella bywydau plant.

O fis Ebrill ymlaen, bydd rhieni unigol yn gallu cael rhagor o gyngor a chymorth ariannol o'r Ganolfan Byd Gwaith. Mae'r gwasanaethau newydd yn cynnwys:

• Digwyddiadau Opsiynau a Dewisiadau - sesiynau grŵp y gall rhieni unigol wirfoddoli i'w mynychu i ddysgu mwy am ein cymorth newydd a'r newidiadau i ddod (dysgwch ragor am y newidiadau hyn isod).
• Cyfweliadau am Swyddi wedi'u Gwarantu - lle y bo'n bosibl, cyfweliad swydd i bob rhiant unigol sy'n barod i weithio.
• Estyniad cenedlaethol o Gredyd Mewn Gwaith – hyd at £2080 (neu £3120 yn Llundain) ar gyfer rhieni unigol yn ystod y flwyddyn gyntaf yn ôl mewn gwaith.
• Costau Gofal plant Ymlaen Llaw– cynllun peilot yn Llundain i helpu i dalu ffioedd cofrestru, blaendaliadau a thaliadau ymlaen llaw.
• Cymorth Ymgynghorydd Mewn Gwaith – cyswllt misol gydag ymgynghorydd ar gyfer 26 wythnos gyntaf o fod yn ôl mewn gwaith.
• Cronfa Ddisgresiwn Frys mewn Gwaith  – er mwyn helpu rhieni unigol sy'n dechrau gwaith i ymdopi â'r costau annisgwyl a allai arwain atynt yn gadael eu swyddi newydd.

Mae rhieni unigol â phlant hŷn eisoes yn cael budd o gyswllt rheolaidd ag ymgynghorydd. O fis Ebrill, bydd rhieni unigol gyda phlentyn ieuengaf hyd at bedair oed yn dechrau cael cyfweliadau sy'n canolbwyntio ar waith bob chwe mis, yn ogystal â phartneriaid rhieni sy'n hawlio Lwfans Ceisio Gwaith.

Daw'r Ddeddf Gofal Plant i rym ym mis Ebrill yng Nghymru a Lloegr, a fydd yn golygu y bydd gan Awdurdodau Lleol ddyletswydd i roi gofal plant digonol i fodloni'r galw.

Gallwch gael rhagor o wybodaeth am y newidiadau ar-lein.

Newidiadau i Gymhorthdal Incwm

Ym mis Rhagfyr, mae'r Ganolfan Byd Gwaith yn nodi ei bwriad i wneud newidiadau i'r budd-daliadau y gall rhieni unigol eu cael. O fis Hydref 2008, ni fydd hawl gan rieni unigol y mae eu plentyn ieuengaf yn 12 oed neu drosodd i gael Cymhorthdal Incwm ar y sail eu bod yn rhiant unigol yn unig mwyach. Dros amser caiff hyn ei ymestyn i rieni unigol gyda phlentyn ieuengaf sy'n 10 oed neu drosodd (o fis Hydref 2009) a gyda phlentyn ieuengaf sy'n 7 oed neu drosodd (o fis Hydref 2010).

Bydd Ymgynghorwyr y Ganolfan Byd Gwaith yn trafod opsiynau rhieni unigol gyda hwy cyn i'r newidiadau ddod i rym, a allai gynnwys gwaith, hawlio Lwfans Ceisio Gwaith, neu hawlio Lwfans Cyflogaeth a Chymorth os oes ganddynt gyflwr iechyd neu anabledd. Mae'n ofynnol gwneud newidiadau deddfwriaethol ar gyfer y newidiadau hyn ac maent yn destun ystyriaeth gan y Pwyllgor Cynghori ar Nawdd Cymdeithasol.

Cyflwyno'r Lwfans Tai Lleol

Dim ond ychydig wythnosau sydd bellach cyn y caiff y Lwfans Tai Lleol - y ffordd newydd o gyfrif Budd-dal Tai ar gyfer pobl sy'n rhentu eu cartrefi gan landlordiaid y sector preifat - ei gyflwyno'n genedlaethol. Caiff y Lwfans Tai Lleol ei gyflwyno ar gyfer hawliadau Budd-dal Tai newydd o 7 Ebrill 2008, ac mae'n decach, yn fwy tryloyw ac mae'n hyrwyddo gwell cyfrifoldeb ariannol.

Ond ni fydd y Lwfans yn berthnasol i bob cwsmer ar unwaith – caiff ei gyflwyno'n raddol i'r rhai sy'n gwneud ceisiadau newydd am fudd-dal neu sy'n newid cyfeiriad. Rhagor o wybodaeth am y Lwfans ar-lein neu anfonwch neges e-bost at lhaadviceline@dwp.gsi.gov.uk

Pecyn Swyddi Newydd ar gael i gwsmeriaid Lwfans Ceisio Gwaith

Mae Pecyn Swyddi newydd ar gael i helpu cwsmeriaid wrth iddynt chwilio am swyddi ar gael bellach a chaiff ei hyrwyddo mewn ymgyrch Chwiliad Gwaith genedlaethol.

Nod y Pecyn Swyddi - ffolder gyda chyfres o daflenni ffeithiau - yw ennyn cwsmeriaid i feddwl yn fwy eang am chwilio am swyddi ac mae'n eu cefnogi drwy roi cyngor am ddod o hyd i swyddi, gwneud ceisiadau am swyddi, mynd i gyfweliadau a dechrau gwaith. 

Yn ystod cyfnod o brofi'r pecyn yn Norfolk, croesawyd y Pecyn Swyddi gan bartneriaid, staff a chwsmeriaid a chaiff ei ddisgwyl yn eiddgar gan ymgynghorwyr y Ganolfan Byd Gwaith sy'n gweithio gyda phobl ddi-waith.  Bydd ar gael yn fwy eang yn y dyfodol agos fel pecyn i'w lawrlwytho o wefan y Ganolfan Byd Gwaith.

Lansiwyd ymgyrch genedlaethol Chwiliad Gwaith y Ganolfan Byd Gwaith ym mis Chwefror 2008, ac mae'n cynnwys post uniongyrchol i holl gwsmeriaid Lwfans Ceisio Gwaith rhwng 18 a 49 oed sy'n ddi-waith am chwe mis neu fwy. Caiff cwsmeriaid dros 50 oed eu targedu drwy ymgyrch ar wahân sy'n cael ei rhedeg ar y cyd.

Ynglŷn â cadw mewn cysylltiad  – nod cadw mewn cysylltiad yw rhoi crynodebau byr i chi o'r newyddion diweddaraf, datblygiad ein rhaglen foderneiddio, newidiadau sydd ar y gweill i reolau budd-daliadau, y newyddion diweddaraf o ran perfformiad, yn ogystal â newyddion ar faterion polisi pwysig sy'n effeithio ar ein cwsmeriaid a rennir.  Mae cadw mewn cysylltiad yn ategu Touchbase, y cyhoeddiad chwarterol gan DWP, drwy ganolbwyntio'n fisol ar faterion sy'n ymwneud â'r Ganolfan Byd Gwaith.

Os bydd rhywun rydych yn ei adnabod am gael cadw mewn cysylltiad, gallant danysgrifio ar-lein. Ni fydd y Ganolfan Byd Gwaith yn trosglwyddo unrhyw fanylion i drydydd parti. Dim ond i ddarparu gwybodaeth am faterion y Ganolfan Byd Gwaith a'r Adran Gwaith a Phensiynau y caiff eich gwybodaeth ei defnyddio.

Os oes gennych unrhyw sylwadau neu awgrymiadau, anfonwch e-bost at y golygydd (gan gynnwys eich enw, swydd a sefydliad). Ac os nad ydych am gael cadw mewn cysylltiad mwyach dilynwch y cyswllt i ddileu eich enw isod.