Rhieni unigol nad ydynt yn cael Lwfans Ceisio Gwaith

Bydd gan bob person sy’n cymryd rhan Ymgynghorydd Personol wedi’i benodi gan eu contractwr Ardal Gyflogaeth.
Bydd y contractwyr yn darparu cynllun wedi’i deilwra’n unigol a gweithgareddau ar gyfer pob cyfranogwr.
Ar gyfer rhieni unigol nad ydynt yn cael Lwfans Ceisio Gwaith ac sydd wedi gwirfoddoli i gymryd rhan yn y rhaglen Ardal Gyflogaeth, ni fydd budd-daliadau a hawliadau yn newid.

Pobl sy’n cael Lwfans Ceisio Gwaith

Bydd gan bob person sy’n cymryd rhan Ymgynghorydd Personol wedi’i benodi gan eu contractwr Ardal Gyflogaeth.
Bydd y person sy’n cymryd rhan yn gweithio trwy 3 ‘Cham’ gyda’u Hymgynghorydd Personol:

Y Cam Cyntaf

Bydd pob person yn gweithio ar Gynllun Gweithredu gyda’u Hymgynghorydd Personol. Bydd hyn yn edrych ar eu hanghenion ac yn eu helpu i ddelio ag unrhyw anawsterau sy’n eu hatal rhag dod o hyd i waith a gall bara am hyd at 4 wythnos.
Bydd y Cynllun Gweithredu yn cynnwys cynlluniau chwiliad swydd manwl ac yn helpu gyda phethau fel teithio, hyfforddiant a dillad ar gyfer gwaith neu gyfweliadau. Gall hefyd gynnwys hunangyflogaeth os oes gan y person ddiddordeb yn hyn.
Dim ond os yw’r hyfforddiant yn gysylltiedig yn uniongyrchol â swydd arbennig ac y gellir ei gwblhau erbyn diwedd y rhaglen y bydd contractwyr yn ei ystyried fel arfer.

Yr Ail Gam

Mae hwn yn seiliedig ar y Cynllun Gweithredu a gall bara am hyd at 26 wythnos. Bydd y person sy’n cymryd rhan yn dilyn y cynllun ac yn cynnal chwiliad swydd trylwyr. Bydd y contractwr yn darparu’r help y cytunwyd arno yn y Cynllun Gweithredu.

Y Trydydd Cam

Bydd hwn yn dechrau unwaith bydd y person sy’n cymryd rhan wedi dechrau gweithio. Yn ystod y cyfnod 13 wythnos, bydd cymorth mewn swydd ar gael i helpu’r person i aros yn y gwaith.

Dilyniant

Bydd pobl y mae’n rhaid iddynt gymryd rhan ac nad ydynt wedi dod o hyd i swydd erbyn diwedd Cam 2, yn dychwelyd i’w Canolfan Gwaith i wneud cais am fudd-dal. Ond gallant wirfoddoli i gael help gan yr Ardal Gyflogaeth am 22 wythnos arall.

Budd-daliadau a hawliadau

Tra’u bod yng Ngham 1, mae pobl sy’n rhaid iddynt gymryd rhan yn parhau i gael eu budd-daliadau neu eu hawliadau gan y Ganolfan Byd Gwaith.

Tra’u bod yng Ngham 2, bydd pobl y mae’n rhaid iddynt gymryd rhan yn cael taliadau gan y contractwr sy’n cynnal yr Ardal Gyflogaeth. Mae’r taliadau hyn gyfwerth â thaliad eu budd-dal ag eithrio 50c y mae’r Ganolfan Byd Gwaith yn parhau i’w dalu.
Mae hyn er mwyn gwneud yn siŵr y gall y person barhau i gael budd-daliadau yr oeddent eisoes â hawl iddynt, fel Budd-dal Tai.
Bydd pobl sy’n cael Lwfans Ceisio Gwaith yn seiliedig ar gyfraniadau yn parhau i gael y budd-dal hwnnw heb unrhyw newid.

Cosbau

Mae’n rhaid i bobl y mae’n rhaid iddynt gymryd rhan mewn Ardal Gyflogaeth wneud pethau arbennig y disgwylir iddynt eu gwneud fel rhan o’r ffordd y mae Ardaloedd Cyflogaeth yn gweithio. Mae hyn yn cynnwys pethau fel mynychu apwyntiadau a chynnal gweithgareddau a restrir ar eu Cynllun Gweithredu.
Os na fyddant yn gwneud hynny, gall y contractwr sy’n rhedeg yr Ardal Gyflogaeth gysylltu â’r Ganolfan Byd Gwaith am hynny ac efallai y bydd yn rhaid i’r person ddychwelyd i’w swyddfa Canolfan Byd Gwaith. Efallai bydd Swyddog Penderfyniadau yn penderfynu y dylid lleihau Lwfans Ceisio Gwaith y person neu ddod â’i Lwfans Ceisio Gwaith i ben am gyfnod. Gelwir hyn yn gosb.

Cwynion

Gellir datrys y rhan fwyaf o gwynion rhwng y person sy’n cymryd rhan yn yr Ardal Gyflogaeth a’u Hymgynghorydd Personol. Os nad yw hyn yn bosibl, bydd tîm rheoli lleol y contractwr yn delio ag ef.
Os na fydd y gŵyn wedi’i datrys o hyd, gall y person gysylltu â ni yn:

Department for Work and Pensions
Procurement Division
4th Floor, Mayfield Court
56 West Street
Sheffield
S1 4EP
Ebost: employment-zone@dwp.gsi.gov.uk
Ffacs: 0114 267 7373

Os na fydd eich ateb yn datrys y gŵyn, gall y person gysylltu â’u AS.